Kjære absolutt alle saman

Det finst to typar menneske. Den eine typen er dei som heller vil bli torturert enn å snakke offentlig. Den andre typen er dei som ikkje er i stand til å vere til stades i ei forsamling på meir enn to utan å halde tale. Denne siste typen menneske er gjerne engasjerte i lokalpolitikken, og har ein tendens til å ytre orda «eg kan godt seie eit par ord» sjølv om ingen har spurt dei om å seie eit par ord.

Det er vesentlig fleire av den første typen menneske enn den andre typen. Dei fleste som er av den første typen synest den andre typen er ganske irriterande. Men dei er også glade for at dei finst, slik at dei sjølve slepp å halde talar.

Men i mai er det ingen som slepp. Det er frigjering og det er nasjonaldag og det er masse konfirmasjonar og det er sannelig ein heil del bryllup også. Det betyr at presset er ekstra stort i mai for folk som held mykje talar. Og i mai er det heller ingen veg utanom for mange som vanligvis ikkje held talar, men som i eit veikt augneblikk sa ja til å vere fadder, forlover e.l.

Det er med andre ord ekstra mange som treng ekstra gode tale-råd i mai. Derfor er eg stolt over å endelig kunne gi eit råd som både er nyttig og vil spare tid og krefter.

Eg har nemlig oppdaga at det er fullt mulig, faktisk ganske enkelt, å bruke ein konfirmasjonstale som 17. mai-tale. Det er stort sett snakk om å sette inn Eidsvoll i staden for heimplassen til konfirmanten, bytte ut namnet til konfirmanten med «Norge» eller «Grunnlova», justere nokre tal og historiske detaljar, og vips! så har du ein perfekt tale for nasjonaldagen, og du har spart mykje arbeid.

I dette eksemplet har eg sett dei strokne orda frå konfirmasjonstalen i parentes. Vanskeligare er det ikkje. Lykke til!